Сезон 2:
Open Muzej запускае другі сезон падкаста (Un)framed пра сучаснае беларускае мастацтва
ОM Podcast
Open Muzej запускае другі сезон падкаста (Un)framed пра сучаснае беларускае мастацтва
6.07.2026
ОM Podcast
Open Muzej прадстаўляе другі сезон падкаста (Un)framed – пра сучаснае беларускае мастацтва паміж рамкамі і свабодай. Новы сезон прысвечаны пытанням, якія сёння асабліва важныя для разумення беларускага мастацкага поля: што вызначае беларускае мастацтва, хто задае яго межы і як змяняецца яго ўспрыманне ўнутры беларускага кантэксту і па-за яго межамі.
У цэнтры сезона – размова пра рамкі, стэрэатыпы і спосабы бачання. Што такое “беларускае мастацтва” сёння? Ці вызначаецца яно нацыянальным кантэкстам, мовай, месцам, гістарычным досведам, палітычнымі абставінамі, мастацкімі інстытуцыямі або, наадварот, тым, як яно выходзіць за межы гэтых катэгорый? Хто ўсталёўвае гэтыя рамкі: мастакі і мастачкі, куратары, даследчыкі, гледачы, крытыкі, улада, міжнародныя інстытуцыі або сам час?
Другі сезон звяртаецца да таго, як фармаваліся ўяўленні пра беларускае мастацтва ў 1990-я, 2000-я, 2010-я і 2020-я гады. У выпусках будуць гучаць размовы пра кантэкст з’яўлення пэўных клішэ, пра чаканні, якія суправаджалі беларускую мастацкую сцэну ў розныя перыяды, а таксама пра тое, як гэтыя ўяўленні працягваюць уплываць на тое, як беларускае мастацтва апісваюць, інтэрпрэтуюць і ўключаюць у міжнародны культурны дыскурс.
(Un)framed будуецца як падвойная оптыка. З аднаго боку, гэта погляд знутры беларускага кантэксту праз галасы мастакоў, мастачак, куратараў, даследчыкаў і культурных працаўнікоў. З іншага боку, гэта міжнародная перспектыва: як беларускае мастацтва бачаць і разумеюць па-за Беларуссю, якія вобразы і тлумачэнні ўзнікаюць звонку, і што ў гэтым поглядзе можа быць дакладным, абмежаваным або спрошчаным.
Стэрэатыпы ў новым сезоне разглядаюцца не як простая мішэнь для крытыкі, а як інструмент аналізу. Праз іх можна ўбачыць, як уладкавана культурнае поле, якія словы і схемы выкарыстоўваюцца для яго апісання, што застаецца бачным, а што выціскаецца на перыферыю. Таму падкаст становіцца не толькі размовай пра мастацтва, але і даследаваннем мовы, межаў і механізмаў культурнага прадстаўлення.
Новы сезон падкаста імкнецца паказаць, што беларускае мастацтва – не “малое”, не “ціхае” і не “адсутнае”, а жывое, рэфлексіўнае і звязанае з шырэйшым міжнародным кантэкстам. Гэта мастацтва, якое працуе з памяццю, гісторыяй, ідэнтычнасцю, інстытуцыямі, асабістым досведам і глабальнымі працэсамі.
Слухаць другі сезон падкаста (Un)framed можна тут
Першы выпуск другога сезона будзе даступны па спасылцы
Калі вы хочаце вярнуцца да папярэдніх размоў і паслухаць першы сезон падкаста Open Muzej, усе выпускі можна знайсці тут
Другі сезон падкаста Open Muzej рэалізуецца пры падтрымцы Nordic Media Grant programme.
Партнёры праекту: Ambasada Kultury, KALEKTAR, EVAa project
Паслухаць падкаст можна на платформах: